Директорлар кеңесі

Директорлар кеңесі мүшелерінің рөлдері

Директорлар кеңесінің төрағасы Директорлар кеңесіне басшылық жасайды, Директорлар кеңесінің жұмысын ұйымдастырады және тиімді қызметін қамтамасыз етеді, оның отырыстарын жүргізеді, сондай-ақ Жарғыда және Директорлар кеңесі туралы ережеде көзделген өзге де функцияларды жүзеге асырады.

Директорлар кеңесінің мүшелері - акционерлердің өкілдері Директорлар кеңесі өз қызметін жүзеге асырған кезде ірі акционерлердің мүдделерін білдіреді.

Директорлар кеңесінің тәуелсіз директорлары барлық комитеттердің құрамына кіреді, барлық мәселелерді қарайды және Директорлар кеңесі үшін ұсыныстар қабылдайды. Аудит және тұрақты даму комитетінің құрамына тек тәуелсіз директорлар кіреді. Олар қаржылық есептілік, ішкі және сыртқы аудит, тәуекелдер және басқа да маңызды қызмет салалары бойынша шешімдерді қарайды және қабылдайды. Сонымен қатар, тәуелсіз директорлар өздерінің тәуелсіздігіне байланысты жасауға мүдделілігі бар мәмілелер жасасу туралы шешім қабылдайды.

Директорлар кеңесінің мүшелерін сайлау

Директорлар кеңесінің мүшелері Акционерлердің жылдық жалпы жиналысында сайланады және Қазақстан Республикасының заңнамасында, «Қазақтелеком» АҚ Жарғысында және «Қазақтелеком» АҚ Директорлар кеңесі туралы ережеде белгіленген тәртіппен «Қазақтелеком» АҚ-ның Директорлар кеңесінің бұрын сайланған мүшелерінің өкілеттіктері мерзімінен бұрын тоқтатылған жағдайда кезектен тыс жалпы жиналыста қайта сайланады.

Акционерлердің жалпы жиналысы кандидаттардың құзыреттерін, дағдыларын, жетістіктерін, іскерлік беделін және кәсіби тәжірибесін ескере отырып, анық және ашық рәсімдер негізінде Директорлар кеңесінің мүшелерін сайлайды. Директорлар кеңесінің жекелеген мүшелерін немесе оның толық құрамын жаңа мерзімге қайта сайлау кезінде олардың Компанияның Директорлар кеңесі қызметінің тиімділігіне қосқан үлесі назарға алынады.

Директорлар кеңесінің құрамына Директорлар кеңесінің өз функцияларын орындауы және ұйымның ұзақ мерзімді құны мен тұрақты дамуының өсуін қамтамасыз етуі үшін қажетті білімі, дағдылары мен тәжірибесі бар, сондай-ақ мінсіз іскерлік және жеке беделі бар тұлғалар кіруі тиіс.

Директорлар кеңесінің құрамына кандидаттарды іріктеу кезінде мынадай критерийлер назарға алынады:

• басшылық лауазымдардағы жұмыс тәжірибесі;
• Директорлар кеңесінің мүшесі ретіндегі жұмыс тәжірибесі;
• жұмыс өтілі;
• халықаралық сертификаттардың болуын қоса алғанда, білімі, мамандығы;
• бағыттар мен салалар бойынша құзыреттердің болуы (салалар активтер портфеліне байланысты өзгеруі мүмкін);
• іскерлік бедел;
• ұйымның Директорлар кеңесінің құрамына сайланған жағдайда тікелей немесе ықтимал мүдделер қақтығысының болуы.

Директорлар кеңесінің мүшелерін сайлауды Директорлар кеңесінде бір орынға бір кандидат сайланатын жағдайларды қоспағанда, акционерлер дауыс беруге арналған бюллетеньдерді пайдалана отырып, кумулятивтік дауыс беру арқылы жүзеге асырады.

Директорлар кеңесінің мүшесі лауазымына сайлау үшін кандидатуралар мыналар катарынан ұсынылуы мүмкін:

• Акционерлер – жеке тұлғалар.
• Директорлар кеңесіне акционерлердің өкілдері ретінде сайлауға ұсынылған тұлғалар.
• Компанияның акционері болып табылмайтын және Директорлар кеңесіне акционердің өкілі ретінде сайлауға ұсынылмаған жеке тұлғалар.

Директорлар кеңесінің құрамы

«Қазақтелеком» АҚ Директорлар кеңесі 7 адамнан тұрады, оның 3-і тәуелсіз директорлар болып табылады (жалпы санының 43%-ы).

Директорлар кеңесінің қазіргі құрамы:

• Байдәулетов Нұржан Тәліпұлы (Директорлар кеңесінің төрағасы).
• Есекеев Қуанышбек Бақытбекұлы.
• Ауғанов Ғибрат Қайратұлы.
• Абдуалиев Әсет Қуандықұлы.
• Казутин Николай Юрьевич.
• Заика Дмитрий Александрович.
• Неупокоев Артур Викторович.

2023 жылы Директорлар Кеңесі құрамындағы негізгі өзгерістер:

• 19.07.2023 жылы «Қазақтелеком» АҚ Директорлар кеңесінің мүшесі, тәуелсіз директор А.Н. Буянов өз бастамасымен Директорлар кеңесінің мүшесінің өкілеттігін тоқтатты.
• 19.07.2023 жылы Акционерлердің кезектен тыс жалпы жиналысының шешімімен:
  • «Қазақтелеком» АҚ Директорлар кеңесінің мүшесі, тәуелсіз директор А.С. Жұбаевтың өкілеттігі мерзімінен бұрын тоқтатылды;
  • Директорлар кеңесінің құрамына «Қазақтелеком» АҚ Директорлар кеңесінің қалған өкілеттік мерзіміне тәуелсіз директорлар ретінде А.К. Абдуалиев пен А.В. Неупокаев сайланды.

Директорлар тәуелсіздігі

«Акционерлік қоғамдар туралы» Заңның талаптарына сәйкес Директорлар кеңесінің тәуелсіз мүшелерінің саны 30%-дан кем болмауы тиіс. 2023 жылы «Қазақтелеком» АҚ Директорлар кеңесіндегі бұл үлес 43%-ды құрады.

Тәуелсіз директор деген жеке акционерлердің, атқарушы органның және басқа да мүдделі тараптардың ықпалынан бос, тәуелсіз және объективті шешімдер қабылдау үшін жеткілікті кәсібилігі мен дербестігі бар тұлға.

Тәуелсіз директор - Директорлар кеңесінің мүшесі, ол:

• осы акционерлік қоғамның және Директорлар кеңесіне сайланғанға дейінгі үш жыл ішінде (осы акционерлік қоғамның тәуелсіз директоры лауазымында болған жағдайды қоспағанда) үлестес тұлғасы болып табылмайды;
• осы акционерлік қоғамның үлестес тұлғаларына қатысты үлестес тұлға болып табылмайды;
• осы акционерлік қоғамның лауазымды тұлғаларымен немесе осы акционерлік қоғамның үлестес тұлғаларымен бағыныстылықпен байланысты емес және Директорлар кеңесіне сайланғанға дейінгі үш жыл ішінде осы тұлғалармен бағыныстылықпен байланысты емес;
• мемлекеттік қызметші болып табылмайды;
• осы акционерлік қоғам органдарының отырыстарында және Директорлар кеңесіне сайланғанға дейінгі үш жыл ішінде акционердің өкілі болып табылмайды;
• аудиторлық ұйымның құрамында жұмыс істейтін аудитор ретінде осы акционерлік қоғамның аудитіне қатыспайды және Директорлар кеңесіне сайланғанға дейінгі үш жыл ішінде мұндай аудитке қатыспаған.

Компанияның Директорлар кеңесінің тәуелсіз директорлары 2023 жылы тәуелсіздік критерийлеріне толық сәйкес келді.

Мүдделер қайшылығын басқару

«Қазақтелеком» АҚ-да мүдделер қайшылығын реттеу саясаты бар. Саясат мүдделер қайшылығының алдын алу, анықтау және реттеу тәртібін, мүдделер қайшылығы туындаған немесе туындау ықтималдығы жағдайында Компания органдарының және/немесе тұлғаларының өзара әрекеттесу мен үйлестіру рәсімдерін айқындайды.

Мүдделер қайшылығын реттеу жөніндегі саясаттың міндеттері:

• Мүдделер қайшылығының алдын алу, анықтау және жою бойынша жағдайлар жасау.
• Қазақстан Республикасының заңнамасына және Компанияның ішкі құжаттарына сәйкес Компания мен оның акционерлерінің мүддесі үшін осы Саясат шараларымен мүдделер қайшылығын реттеу.
• Компанияның қызметкері, Директорлар кеңесінің мүшесі өз құзыреті шегінде қабылдаған шешімдердің заңдылығын, негізділігін және Компания мүдделеріне сәйкестігін сақтау.
• Мүдделер қайшылығын уақтылы анықтауды және шешуді қамтамасыз ететін тиісті қызмет мәдениетін қалыптастыруға жәрдемдесу.
• Органдардың, құрылымдық бөлімшелерінің және Компания қызметкерлерінің жұмысының тиімділігіне нұқсан келтірмей, мүдделер қайшылығын ашық және уақтылы басқару.
• Компания қызметкерінің, Директорлар кеңесі мүшесінің өз құзыреті шегінде қабылданған шешімдер үшін жеке жауапкершілігін қамтамасыз ету.
• Ішкі және сыртқы есеп беру тетіктерін енгізу.
• Акционерлердің құқықтарының сақталуын, сондай-ақ Компанияның мүліктік мүдделері мен іскерлік беделін қорғауды қамтамасыз ету.
• Компанияның шешім қабылдау механизміне нұқсан келтірілмейтін жағдайларды қамтамасыз ету.
• Компаниядағы мүдделер қайшылығының алдын алу рәсімдерін өзгермелі шындыққа сәйкес одан әрі жетілдіру.

Мүдделер қайшылығын реттеу саясатына сәйкес Компанияның Директорлар кеңесінің мүшелері:

• Директорлар кеңесіне кез келген нақты немесе ықтимал Мүдделер қайшылығы туралы ақпаратты ашуға.
• Мүдделер қайшылығына әкеп соғуы мүмкін әрекеттерді жасамауға.
• Компанияның Директорлар кеңесі мүшелерінің Мүдделер қайшылығы бар мәмілелер бойынша шешім қабылдамауға.
• тұрақты түрде, тоқсанына бір рет, сондай-ақ сұрау бойынша Комплаенс қызметіне осы Саясатқа қосымшаға сәйкес нысан бойынша өзіңің үлестес тұлғалары (жеке және заңды тұлғалар) туралы ақпаратты ұсынуға міндетті.

2023 жылы Директорлар кеңесінің жұмысында мүдделер қайшылығы тіркелген жоқ.

Директорлар кеңесінің қызметі

2023 жылы Директорлар Кеңесінің отырыстары қолданыстағы бейнеконференция өткізу платформаларын пайдалана отырып, онлайн-форматта өткізілді.

Жыл ішінде Директорлар кеңесінің 14 отырысы өткізіліп, онда 103 мәселе қаралды.

Директорлар кеңесінің 2023 жылғы негізгі шешімдері:

• Компанияның ESG-тәжірибесін дамытудың Жол картасын бекіту.
• «Уәкілетті органның талаптары шеңберінде желіні жаңғырту» стратегиялық жобасының бизнес-жоспарын бекіту.
• «Қазақтелеком» АҚ Компаниялар тобының ұялы байланыс операторларының кейбір мәселелерін қарау.
• «Қазақтелеком» АҚ-ның 2024–2028 жылдарға арналған Бизнес-жоспарын бекіту.

Сондай-ақ тұрақты негізде Бизнес-жоспарды орындау, қауіпсіздік пен еңбекті қорғауды қамтамасыз ету, стратегиялық жобаларды іске асыру, тәуекелдер, Стратегияны орындау, ұялы байланыс операторлардың қызметі мәселелері бойынша Басқарманы тыңдау жүзеге асырылды.

Директорлар кеңесінің 2023 жылғы қызметін қорытындылай келе, Компанияның Директорлар кеңесінің мүшелерімен корпоративтік дауласу жағдайлары, сондай-ақ олардың заңсыз мінез-құлық фактілері анықталған жоқ.

Директорлар кеңесінің қызметін бағалау

«Қазақтелеком» АҚ Директорлар кеңесінің қызметін бағалау «Директорлар кеңесі мен оның комитеттерінің, Директорлар кеңесі мүшелерінің және Корпоративтік хатшының қызметін бағалау қағидаларына» сәйкес жүргізіледі. Осы құжатқа сәйкес Директорлар кеңесін бағалау жылына бір рет өзін-өзі бағалау жолымен және кемінде үш жылда бір рет тәуелсіз консультанттарды тарту арқылы жүргізіледі.

Директорлар кеңесінің соңғы сыртқы бағалауын 2021 жылы PricewaterhouseCoopers кеңесшілері жүргізді. PricewaterhouseCoopers бағалауына сәйкес «Директорлар кеңесі мен атқарушы органның тиімділігі» көрсеткіші бойынша рейтинг 2018 жылы ВВ деңгейінен 2021 жылы ВВВ деңгейіне дейін өсті. Бұдан басқа, осы бағалау қорытындысы бойынша Корпоративтік басқаруды жетілдіру жөніндегі жоспарға Директорлар Кеңесінің қызметіне байланысты іс-шаралар енгізілді.

Көрсетілген Ережелерге сәйкес Директорлар кеңесінің 2023 жылғы қызметін бағалау өзін-өзі бағалау арқылы жүргізілді. Бағалау критерийлерінің тізбесі стратегиялық ойлау деңгейін бағалау, саланы білу, кәсіби тәжірибе, командалық жұмысқа бейілділік, тұрақты даму қағидаттарын ұстану және басқа да мәселелерді қамтыды.

Директорлар кеңесі мүшелерінің қызметін бағалау нәтижелері отырыста қаралды. Директорлар кеңесінің әрбір мүшесі ақылға қонымды, білікті, тиімді әрекет етті, бұл Компанияның жоғары қаржылық және өндірістік нәтижелерінде де көрініс тапты. Осыған байланысты Директорлар кеңесінің қызметі 2023 жылдың қорытындысы бойынша оң бағаланды.

Директорлар кеңесі мүшелерінің кәсіби құзыретін арттыру

Компанияда Директорлар кеңесінің мүшелерінің біліктілігін арттыру және сыртқы сарапшыларды тарту саясаты бар. Бұл саясат Директорлар кеңесі қарайтын мәселелер сыртқы кәсіби және тәуелсіз сараптаманы талап ететін болса, Директорлар кеңесі мүшелерінің дағдыларын дамыту және біліктілігін арттыру жүйесін енгізу және олардың сыртқы сарапшыларды тарту құқығын іске асыру жолымен Директорлар кеңесі жұмысының тиімділігін арттыру мақсатында корпоративтік басқарудың үздік практикасын ескере отырып әзірленді. 2023 жылы Директорлар кеңесінің мүшелерін оқыту жүргізілген жоқ.

Директорлар кеңесінің комитеттері

2023 жылы Директорлар кеңесі жанынан үш комитет жұмыс істеді: Аудит және тұрақты даму комитеті, Кадрлар, сыйақылар және әлеуметтік мәселелер жөніндегі комитет, Стратегиялық жоспарлау комитеті.

Комитеттердің сандық құрамын, өкілеттік мерзімін, олардың Төрағасы мен мүшелерін сайлауды, сондай-ақ олардың өкілеттіктерін мерзімінен бұрын тоқтатуды Компанияның Директорлар кеңесі айқындайды және жүзеге асырады. «Самұрық-Қазына» қорының Корпоративтік басқару кодексіне сәйкес Комитет Төрағасы Тәуелсіз директор – Директорлар кеңесінің мүшесі болып табылады.

Аудит және тұрақты даму комитеті

«Қазақтелеком» АҚ Директорлар кеңесінің Аудит жөніндегі комитеті Директорлар кеңесінің шешімімен 2006 жылы құрылды. 2022 жылғы шілдеде Директорлар кеңесінің шешімімен Аудит жөніндегі комитет Аудит және тұрақты даму жөніндегі комитет болып қайта аталды және өз қызметін Директорлар кеңесінің 19.07.2022 жылғы шешімімен бекітілген Комитет туралы ережеге сәйкес жүзеге асырады.

Комитеттің 2023 жылғы құрамы:

1 қаңтардан 19 шілдеге дейін:
Жұбаев Арманбай Сапарбайұлы (Комитет төрағасы), Буянов Алексей Николаевич, Заика Дмитрий Александрович;

21 шілдеден бастап:
Абдуалиев Әсет Қуандықұлы (Комитет төрағасы), Заика Дмитрий Александрович, Неупокоев Артур Викторович.

«Қазақтелеком» АҚ Корпоративтік басқару кодексіне сәйкес Аудит және тұрақты даму комитеті толығымен «Акционерлік қоғамдар туралы» Қазақстан Республикасы Заңының 1-бабының 20) тармақшасында көзделген директорлардың тәуелсіздігін тану критерийлеріне сәйкес келетін тәуелсіз директорлардан тұрады.

Комитет туралы ережеге сәйкес Комитет төрағасы отырыстарға күн тәртібіндегі мәселелер бойынша ақпарат ұсынуға:

• Директорлар кеңесінің мүшелерін.
• Ішкі аудит және Комплаенс қызметінің басшысын.
• «Эрнст энд Янг» ЖШС сыртқы аудиторының өкілдерін.
• Қоғам қызметкерлерін (топ-менеджмент, құрылымдық бөлімшелердің басшылары, мамандар) және еншілес ұйымдардың қызметкерлерін шақырды.

Аудит және тұрақты даму комитеті тоқсанына кемінде бір рет тұрақты бетпе-бет отырыстар және қажетіне қарай кезектен тыс отырыстар өткізеді.

Комитет 2023 жылы 8 отырыс өткізді, онда 29 мәселе қаралды (оның ішінде Ішкі аудит қызметі, Комплаенс қызметі, ішкі бақылау және тәуекелдер, қаржылық есептілік, сыртқы аудит мәселелері), сондай-ақ Директорлар кеңесіне тиісті ұсынымдар берілді.

Комитет 2023 жылға арналған Жұмыс жоспарына сәйкес жұмыс істеді. Комитет мүшелері оның әрбір отырысына белсенді қатысты.

Комитет өз жұмысында «Қазақтелеком» АҚ Жарғысын, Қоғамның Корпоративтік басқару кодексін, Комитет туралы ережені басшылыққа алады.

Кадрлар, сыйақылар және әлеуметтік мәселелер жөніндегі комитет

Директорлар кеңесінің Кадрлар, сыйақылар және әлеуметтік мәселелер жөніндегі комитеті «Қазақтелеком» АҚ Директорлар кеңесінің шешімімен 2015 жылы құрылды.

Комитет өз қызметінде Директорлар кеңесіне толық есеп береді және өз қызметін Директорлар кеңесінің 18.03.2015 жылғы №2 Хаттамасымен бекітілген «Қазақтелеком» АҚ Директорлар кеңесінің Кадрлар, сыйақылар және әлеуметтік мәселелер жөніндегі комитеті туралы ережеге сәйкес жүзеге асырады.

«Қазақтелеком» АҚ Директорлар кеңесінің Кадрлар, сыйақылар және әлеуметтік мәселелер жөніндегі комитетінің 2023 жылғы құрамы:

1 қаңтардан 19 шілдеге дейін:
Буянов Алексей Николаевич (Комитет төрағасы), Жұбаев Арманбай Сапарбайұлы, Заика Дмитрий Александрович, Ауғанов Ғибрат Қайратұлы;

21 шілдеден бастап:
Заика Дмитрий Александрович (Комитет төрағасы), Абдуалиев Әсет Қуандықұлы, Неупокоев Артур Викторович, Ауғанов Ғибрат Қайратұлы.

Кадрлар, сыйақылар және әлеуметтік мәселелер жөніндегі комитет туралы ережеге сәйкес Комитет төрағасы отырыстарға баяндамашылар, бақылаушылар ретінде, сондай-ақ күн тәртібіндегі мәселелер бойынша ақпарат беру үшін:

• Директорлар кеңесінің мүшелерін.
• Қоғам қызметкерлерін (топ-менеджмент, құрылымдық бөлімшелердің басшылары, мамандар).
• Басшы қызметкерлер лауазымдарының тізбесіне сәйкес басшы лауазымдарға кандидаттарды шақырды.

Кадрлар, сыйақылар және әлеуметтік мәселелер жөніндегі комитет 2023 жылы 10 бетпе-бет отырыс өткізді, онда 33 мәселе қаралды (оның ішінде әлеуметтік сипаттағы мәселелер, Орталық аппараттың құрылымындағы өзгерістер, қызметкерлерді Қоғам Басқармасының құрамына сайлау, еншілес ұйымдардың бірінші басшыларын лауазымдарға тағайындау, басшы қызметкерлерге ҚНК бекіту, еңбекақы төлеу, персоналды басқару), сондай-ақ Директорлар кеңесіне тиісті ұсыныстар берілді. Комитет 2023 жылға арналған Жұмыс жоспарына сәйкес жұмыс істеді.

Стратегиялық жоспарлау комитеті

«Қазақтелеком» АҚ Директорлар кеңесінің Стратегиялық жоспарлау комитеті 2010 жылы Директорлар кеңесінің шешімімен құрылды. Стратегиялық жоспарлау жөніндегі Комитет Директорлар кеңесінің консультациялық-кеңесші органы болып табылады және өз қызметін Директорлар кеңесінің 19.11.2010 жылғы шешімімен бекітілген Стратегиялық жоспарлау комитеті туралы ережеге сәйкес жүзеге асырады.

2023 жылы «Қазақтелеком» АҚ Директорлар кеңесінің Стратегиялық жоспарлау комитетінің құрамы:

1 қаңтардан 19 шілдеге дейін:
Заика Дмитрий Александрович (Комитет төрағасы), Буянов Алексей Николаевич, Жұбаев Арманбай Сапарбайұлы, сондай-ақ дауыс беруге құқығы жоқ сарапшылар Шарипов Тимур Сабржанұлы және Мұқанова Алмагүл Өмірзаққызы;

21 шілдеден бастап:
Неупокоев Артур Викторович (Комитет төрағасы), Абдуалиев Әсет Қуандықұлы, Заика Дмитрий Александрович, сондай-ақ дауыс беруге құқығы жоқ сарапшылар Шарипов Тимур Сабржанұлы және Мұқанова Алмагүл Өмірзаққызы.

Комитет төрағасы отырыстарға бақылаушылар, баяндамашылар ретінде, сондай-ақ күн тәртібіндегі мәселелер бойынша ақпарат беру үшін:

• Басқарма мүшелерін.
• Қоғамның, сондай-ақ еншілес ұйымдардың басшысын және өзге де қызметкерлерін.
• «Самұрық-Қазына» АҚ өкілдерін шақырды.

Стратегиялық жоспарлау комитеті Комитеттің шешімімен бекітілген жылдық жоспарға сәйкес отырыстарды, бірақ тоқсанына кемінде бір рет, қажетіне қарай кезектен тыс отырыстарды өткізеді.

Стратегиялық жоспарлау комитеті 2023 жылы 7 бетпе-бет отырыс өткізді, онда 11 мәселе қаралды және олар бойынша Қоғамның Директорлар кеңесіне тиісті ұсынымдар берілді. Бұл стратегия, бизнес-жоспарлау, стратегиялық жобалар, Қоғамды Дамыту жоспары және Қоғам қызметінің басқа да маңызды мәселелері. Комитет 2023 жылға арналған Жұмыс жоспарына сәйкес жұмыс істеді.

Директорлар кеңесінің сыйақысы

«Қазақтелеком» АҚ Акционерлерінің жалпы жиналысының 12.08.2021 жылғы шешіміне сәйкес тәуелсіз директорға Директорлар кеңесінің комитеттеріне мүшелік/төрағалық еткені үшін тіркелген жылдық сыйақы және қосымша сыйақы төленеді:

Компания Директорлар кеңесінің мүшелеріне-резиденттерге 2023 жылы төлеген жиынтық сыйақысы 57 356 111,65 теңгені құрайды. Компанияның Директорлар кеңесінің мүшелеріне-бейрезиденттерге 2023 жылы төлеген жалпы сыйақысы 56,148,87 АҚШ долларын құрайды. Компанияның Директорлар кеңесінің мүшелеріне 2023 жылы төленген жалпы сыйақысы 82 631 922,24 теңгені құрайды.

Директорлар кеңесі туралы ережеге сәйкес Тәуелсіз директордың өкілеттігі жартыжылдық аяқталғанға дейін тоқтатылған (оның ішінде мерзімінен бұрын) жағдайда Тәуелсіз директорға Директорлар кеңесінің құрамында нақты болған кезең үшін сыйақы және өтемақы төленеді.

«Қазақтелеком» АҚ-ның Директорлар кеңесі туралы ережеге және Директорлар кеңесінің тәуелсіз мүшелеріне сыйақы төлеу саясатына сәйкес «Қазақтелеком» АҚ Акционерлерінің жалпы жиналысының шешімімен Тәуелсіз директорға бір жыл ішіндегі жұмыс қорытындылары бойынша қосымша сыйақы төленуі мүмкін.

Корпоративтік хатшы

Корпоративтік хатшы өз қызметінде Директорлар кеңесіне есеп береді, өз қызметін Қазақстан Республикасы заңнамасының, Жарғының, Корпоративтік басқару кодексінің, өзге де ішкі құжаттардың нормаларына, сондай-ақ Акционерлердің жалпы жиналысы мен Директорлар кеңесінің шешімдеріне сәйкес жүзеге асырады.

Корпоративтік хатшы өз қызметі шеңберінде Акционерлердің жалпы жиналыстары мен Директорлар кеңесінің отырыстарын дайындау мен өткізуді бақылайды, Директорлар кеңесінің іс қағаздарын ұйымдастырады және құжат айналымын қамтамасыз етеді, Директорлар кеңесінің отырыстарын шақыруды қамтамасыз етеді және осы отырыстардың хаттамаларын жүргізеді, Директорлар Кеңесінің мүшелеріне қажетті ақпарат береді.

«Қазақтелеком» АҚ Корпоративтік хатшысы Б.Қ. Әбдіқалықовтың мемлекеттік марапаттары, «Үздік байланысшы» салалық атағы бар. «Самұрық-Қазына» қоры Компаниялар тобының үздік корпоративтік хатшыларының бірі, корпоративтік басқаруды және корпоративтік хатшылар институтын одан әрі жетілдіру жөніндегі түрлі іс-шаралардың тұрақты қатысушысы болып танылды. Орталық Азия Корпоративтік хатшылар қауымдастығының құрметті мүшесі, Корпоративтік хатшы 2023 байқаудың қазылар алқасының төрағасы болып табылады.

Корпоративтік хатшы туралы ережемен Компанияның корпоративтік интернет-ресурсында «Корпоративтік басқару» бөлімінде танысуға болады.